ភ្នំពេញ៖ នៅរសៀលថ្ងៃសុក្រ ទី១២ ខែកញ្ញា ឆ្នាំ២០២៥ នៅទីស្តីការក្រសួងសាធារណការ និងដឹកជញ្ជូន ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអនុញ្ញាតឱ្យលោក Francois Corbin អនុប្រធានសហព័ន្ធនិយោជកបារាំងអន្តរជាតិ (MEDEF International) និងប្រតិភូ ចូលជួបសម្តែងការគួរសម និងពិភាក្សាការងារស្តីពីកិច្ចសហប្រតិបត្តិការលើគម្រោងហេដ្ឋារចនាសម្ព័ន្ធ។ ជំនួបនេះមានការចូលរួមពីថ្នាក់ដឹកនាំក្រសួង និងមន្ត្រីពាក់ព័ន្ធ។ក្នុងជំនួបនេះ ភាគីទាំងពីរបានផ្តោតការពិភាក្សាលើអាទិភាពអភិវឌ្ឍន៍ហេដ្ឋារចនាសម្ព័ន្ធដឹកជញ្ជូនរបស់កម្ពុជា ជាពិសេសយុទ្ធសាស្ត្រអភិវឌ្ឍន៍ផ្លូវដែក ២ ដំណាក់កាលក្នុងរយៈពេលមួយទសវត្សរ៍។ គម្រោងនេះសង្កត់ធ្ងន់លើការអភិវឌ្ឍរថភ្លើងល្បឿនលឿន ដើម្បីជំរុញការតភ្ជាប់ និងកំណើនសេដ្ឋកិច្ច។ ឯកឧត្តមរដ្ឋមន្ត្រីបានលើកឡើងពីការប្តេជ្ញាចិត្តរបស់រដ្ឋាភិបាលកម្ពុជាក្នុងការលើកកម្ពស់ប្រព័ន្ធដឹកជញ្ជូនប្រកបដោយចីរភាព និងកាត់បន្ថយការបំភាយឧស្ម័នផ្ទះកញ្ចក់ ស្របតាមគោលដៅបរិស្ថានជាតិ។លោក Francois Corbin បានសម្តែងការកោតសរសើរចំពោះចក្ខុវិស័យរបស់កម្ពុជា និងបានបង្ហាញពីចំណាប់អារម្មណ៍របស់ MEDEF International ក្នុងការពង្រឹងកិច្ចសហប្រតិបត្តិការជាមួយកម្ពុជា តាមរយៈភាពជាដៃគូរវាងរដ្ឋ និងឯកជន (PPP)។ លោកបានគូសបញ្ជាក់ពីសក្តានុពលនៃការវិនិយោគរបស់ក្រុមហ៊ុនបារាំងលើគម្រោងផ្លូវដែក និងបច្ចេកវិទ្យាដឹកជញ្ជូនទំនើប។ឯកឧត្តម ប៉េង ពោធិ៍នា បានស្នើឱ្យភាគីបារាំងពិនិត្យលទ្ធភាពនៃការផ្តល់ជំនួយបច្ចេកទេស និងការវិនិយោគលើគម្រោងរថភ្លើងល្បឿនលឿន ដើម្បីធានាប្រសិទ្ធភាព និងនិរន្តរភាព។ ជំនួបនេះបានបញ្ចប់ដោយការឯកភាពលើការបន្តទំនាក់ទំនង និងការរៀបចំផែនការសម្រាប់កិច្ចប្រជុំបន្ទាប់ ដើម្បីជំរុញកិច្ចសហប្រតិបត្តិការឱ្យកាន់តែស៊ីជម្រៅ។ជំនួបនេះជាសញ្ញាវិជ្ជមានមួយបង្ហាញពីការប្តេជ្ញាចិត្តរបស់កម្ពុជាក្នុងការពង្រឹងហេដ្ឋារចនាសម្ព័ន្ធដឹកជញ្ជូន និងទាក់ទាញការវិនិយោគបរទេស ដើម្បីជំរុញកំណើនសេដ្ឋកិច្ចជាតិ។
0 $type={blogger}:
Post a Comment