ខេត្តជាង ៣០ នៅថៃ រងគ្រោះដោយទឹកជំនន់ធ្ងន់ធ្ងរបំផុតមិនធ្លាប់មានក្នុងរយៈពេលជាង ៣០០ ឆ្នាំ

ស្ថានភាពទឹកជំនន់នៅប្រទេសថៃ គិតត្រឹមថ្ងៃទី ២៥ ខែវិច្ឆិកា ឆ្នាំ២០២៥ នៅតែមិនទាន់ធូរស្បើយនៅឡើយ ខណៈខេត្តជាង ៣០ ទូទាំងប្រទេស រួមទាំងតំបន់កណ្តាល និងភាគខាងត្បូង កំពុងរងគ្រោះដោយទឹកជំនន់ដ៏ធ្ងន់ធ្ងរបំផុតមិនធ្លាប់មានក្នុងរយៈពេលជាង ៣០០ ឆ្នាំមកនេះ។នាយកដ្ឋានបង្ការ និងកាត់បន្ថយគ្រោះមហន្តរាយថៃ (DDPM) បានរាយការណ៍ថា នៅតំបន់ភាគកណ្តាល មានខេត្តចំនួន ១១ ដែលរងផលប៉ះពាល់ធ្ងន់ធ្ងរបំផុត រួមមាន៖
Phitsanulok, Nakhon Sawan, Uthai Thani, Sing Buri, Chai Nat, Ang Thong, Suphan Buri, Ayutthaya, Pathum Thani, Nonthaburi និង Nakhon Pathom។
ទឹកជំនន់បានជន់លិចផ្ទះសម្បែង ផ្លូវថ្នល់ និងដីស្រែចម្ការរាប់ម៉ឺនហិកតា ដោយកម្ពស់ទឹកនៅតំបន់ខ្លះខ្ពស់ជាង ២ ម៉ែត្រ។របាយការណ៍ថ្មីៗបង្ហាញថា គ្រោះទឹកជំនន់នៅតំបន់កណ្តាលបានសម្លាប់មនុស្ស ២៨ នាក់ (ភាគច្រើននៅខេត្ត Phra Nakhon Si Ayutthaya ១៩ នាក់, Sing Buri ៣ នាក់ និង Suphan Buri ៣ នាក់) និងប៉ះពាល់ប្រជាជនជាង ៤៨៣,០០០ នាក់ ក្នុងចំណោមគ្រួសារ ១៤៣,០០០ គ្រួសារ។ចំណែកតំបន់ភាគខាងត្បូង ស្ថានភាពកាន់តែអាក្រក់ ជាពិសេសនៅក្រុង Hat Yai ខេត្ត Songkhla ដែលទឹកជំនន់បានជន់លិចទីប្រជុំជនស្ទើរទាំងមូល។ ខេត្តចំនួន ១០ នៅភាគខាងត្បូង (Surat Thani, Krabi, Nakhon Si Thammarat, Trang, Phatthalung, Satun, Songkhla, Pattani, Yala និង Narathiwat) បានរងផលប៉ះពាល់លើស្រុក ៥៨១ និងភូមិ ៤,១៤៦ ដោយប៉ះពាល់គ្រួសារជាង ៧១០,៨៥៨ គ្រួសារ ឬស្មើនឹងប្រជាជនជិត ២ លាននាក់។អ្នកជំនាញសេដ្ឋកិច្ចថៃប៉ាន់ស្មានថា គ្រោះទឹកជំនន់នេះកំពុងធ្វើឱ្យប្រទេសថៃខាតបង់ទឹកប្រាក់ពី ១,០០០ ទៅ ១,៥០០ លានបាតក្នុងមួយថ្ងៃ ដោយសារវិស័យទេសចរណ៍ ពាណិជ្ជកម្ម រោងចក្រ និងការវិនិយោគត្រូវបានរាំងស្ទះយ៉ាងធ្ងន់ធ្ងរ។ បើស្ថានភាពនេះបន្តរហូតដល់ ១ ខែ ការខាតបង់សរុបអាចឈានដល់ ១០,០០០–១៥,០០០ លានបាត (ប្រហែល ៣០០–៤៥០ លានដុល្លារអាមេរិក)។រដ្ឋាភិបាលថៃបានប្រកាសឱ្យខេត្តទាំងអស់ស្ថិតក្នុងភាពស្ថានត្រៀមខ្ពស់បំផុត ខណៈកងទ័ព នគរបាល និងអង្គការស្ម័គ្រចិត្តជាច្រើនកំពុងប្រឹងប្រែងជួយសង្គ្រោះ និងចែកជំនួយដល់ជនរងគ្រោះ។