ឯកឧត្តម ហ្សង់ ហ្វ្រង់ស័រ តាន់ ៖ កម្ពុជាគួរយល់ដឹង សន្តិភាពយូរអង្វែងនិងស្ថាពរគឺជារឿងពិបាក....

នៅ ថ្ងៃទី២០ ខែតុលា ឆ្នាំ២០២៥ – ឯកឧត្តម ហ្សង់ ហ្វ្រង់ស័រ តាន់ បានបង្ហោះសារមួយថា ជម្លោះព្រំដែនជាមួយប្រទេសជិតខាងខាងលិច (ថៃ) ដែលកើតមានតាំងពីឆ្នាំ១៩៥៣ នៅតែជាបញ្ហារុាំរ៉ៃ ដែលដំណោះស្រាយនានា (ឆ្នាំ១៩៦២, ២០១៣, ឬ២០២៥ បើសម្រេចបាន) មានលក្ខណៈបណ្តោះអាសន្នប៉ុណ្ណោះ។ ឯកឧត្តមបានសង្កត់ធ្ងន់ថា ការសង្ឃឹមឱ្យមានសន្តិភាពយូរអង្វែងនិងស្ថាពរគឺជារឿងពិបាក។ឯកឧត្តមបានលើកឡើងថា បញ្ហានេះកើតចេញពីការបណ្តុះស្មារតីប្រជាជនជាច្រើនជំនាន់របស់ប្រទេសជិតខាងឱ្យស្រណោះសម័យកាលមុនអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧។ លើសពីនេះ អស្ថិរភាពនយោបាយ ជាពិសេសតាំងពីឆ្នាំ២០០១ បានជំរុញថ្នាក់ដឹកនាំឱកាសនិយមមួយចំនួនរបស់គេឱ្យបង្វែរបញ្ហាផ្ទៃក្នុងទៅជាជម្លោះព្រំដែន ដើម្បីបង្រួបបង្រួមជាតិរបស់ខ្លួន តាមរយៈការចោទប្រកាន់កម្ពុជាថា «ឈ្លានពានទឹកដី»។ នេះធ្វើឱ្យគេមិនទទួលស្គាល់សន្ធិសញ្ញា សេចក្តីសម្រេចរបស់តុលាការអន្តរជាតិ និងឯកសារផ្លូវការនានា។ដើម្បីប្រឈមនឹងបញ្ហានេះ ឯកឧត្តមបានស្នើឱ្យកម្ពុជាមានជំហរនិងការប្តេជ្ញាចិត្តច្បាស់លាស់៖ ជំហរច្បាស់ រួមមាន៖

ការលើកកម្ពស់ឯកភាពជាតិ ដោយជម្រុញឱ្យជនរួមជាតិគាំទ្រកងទ័ពនៅជួរមុខ។
ការពារសន្តិសុខជាតិ តាមរយៈការរក្សាការសម្ងាត់នៃព័ត៌មានសំខាន់ៗ។
ការជំរុញយុទ្ធសាស្ត្រ «ឈ្នះ-ឈ្នះ» តាមរយៈកិច្ចចរចា ដើម្បីចៀសវាងសង្គ្រាម ដែលជាវិធីសាស្ត្រចាស់ទុំនិងមានចក្ខុវិស័យ។

ការប្តេជ្ញាចិត្តច្បាស់ រួមមាន៖

ការបណ្តុះស្មារតីស្នេហាជាតិ និងបដិសេធជាតិនិយមជ្រុល ដែលអាចនាំឱ្យមានគ្រោះថ្នាក់។
ការអភិវឌ្ឍខ្លួននិងប្រទេសជាតិ ដើម្បីឱ្យកម្ពុជាក្លាយជាប្រទេសខ្លាំងពូកែ ដែលអាចទប់ទល់នឹងការប្រមាថ ការជាន់ឈ្លី និងការឈ្លានពាននាពេលអនាគត។

ឯកឧត្តម ហ្សង់ ហ្វ្រង់ស័រ តាន់ បានបញ្ចប់ដោយអំពាវនាវឱ្យប្រជាជនខ្មែរទាំងអស់រួបរួមគ្នា ដើម្បីការពារបូរណភាពទឹកដី និងអភិវឌ្ឍជាតិឱ្យកាន់តែរឹងមាំ៕