ភ្នំពេញ៖ អ្នកនាំពាក្យព្រឹទ្ធសភា លោក ជា ធិរិទ្ធ បានច្រានចោលការលើកឡើងរបស់លោក Surasan Kongsiri អ្នកនាំពាក្យក្រសួងការពារជាតិថៃ ដែលបានអះអាងថា សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានដាក់សម្ពាធឱ្យថៃបើកច្រកព្រំដែននៅថ្ងៃទី២០ តុលា ខាងមុខ។លោក ជា ធិរិទ្ធ បានបញ្ជាក់ថា ការលើកឡើងនេះមិនត្រឹមត្រូវទេ ដោយសម្តេចតេជោ ហ៊ុន សែន ធ្លាប់បានបញ្ជាក់ជំហរយ៉ាងច្បាស់លាស់តាមទំព័រហ្វេសប៊ុកផ្លូវការរបស់សម្តេច កាលពីថ្ងៃទី២៣ កញ្ញា ២០២៥ ថា៖ «ចាប់តាំងពីយោធាថៃបិទព្រំដែនជាឯកតោភាគីមក កម្ពុជាមិនដែលបានសុំភាគីថៃបើកច្រកវិញទេ គ្រាន់តែប្រាប់ទៅភាគីថៃថា ‘ថៃជាអ្នកបិទ ថៃគឺជាអ្នកបើក មិនបាច់ចរចាជាមួយកម្ពុជាទេ ហើយកម្ពុជានឹងបើកតាមក្រោយយ៉ាងយូរ៥ម៉ោង’»។សម្តេចតេជោបានសង្កត់ធ្ងន់ថា ជំហរនេះនឹងមិនផ្លាស់ប្តូរឡើយ ហើយកម្ពុជាក៏មិនបន្ទន់ឥរិយាបថទៅស្នើសុំឱ្យថៃបើកច្រកព្រំដែននោះដែរ។ សម្តេចបន្តថា៖ «ថៃអាចបន្តបិទសូម្បី១០០ឆ្នាំទៀតក៏កម្ពុជាមិនស្លាប់ដែរ»។អ្នកនាំពាក្យព្រឹទ្ធសភាបានបញ្ជាក់បន្ថែមថា កម្ពុជានៅតែរក្សាជំហរដ៏មុតមាំ និងឯករាជ្យ ដោយមិនពឹងផ្អែកលើការសម្រេចចិត្តរបស់ភាគីថៃក្នុងការគ្រប់គ្រងច្រកព្រំដែនឡើយ។ ៕
0 $type={blogger}:
Post a Comment